Wararka24: Dowladda Pakistan ayaa si rasmi ah u dhammaystirtay bixinta deyn dhan $3.5 bilyan oo ay ku lahayd Dowladda Imaaraadka Carabta , taas oo qayb ka ahayd waajibaadkeeda deynta dibadda.
Bangiga Dhexe ee Pakistan ayaa sheegay in lacag dhan $1 bilyan lagu celiyay Sanduuqa Horumarinta Abu Dhabi, halka $2.45 bilyan la bixiyay toddobaadkii ka horreeyay, taas oo dhammaystirtay guud ahaan deynta la lahaa Imaaraadka.
Deyntan ayaa asalkeedu dib ugu laabanayaa sanadkii 2018-kii, markaas oo Imaaraadku uu Pakistan siiyay $2 bilyan oo dhigaal ah, iyadoo sanadihii xigay la kordhiyay taageerada dhaqaale, oo ay ku jirtay $1 bilyan oo kale sanadkii 2023.
Bixintan ayaa timid kadib markii Pakistan ay heshay taageero maaliyadeed oo dhan $3 bilyan oo ka timid Saudi Arabia, taas oo ka caawisay inay xasiliso kaydka lacagaha qalaad.
Mas’uuliyiinta Pakistan ayaa sheegay inay hadda diiradda saarayaan kor u qaadista kaydka maaliyadeed, iyagoo bartilmaameedsanaya in ay gaarsiiyaan ilaa $18 bilyan dhammaadka sanad-maaliyadeedka socda.
Dowladda Islamabad ayaa sidoo kale ka shaqeynaysa fulinta barnaamij ay la leedahay International Monetary Fund oo qiimihiisu yahay $7 bilyan, si looga baxo caqabadaha dhaqaale ee muddada dheer soo jiitamayay.
Sannadihii u dambeeyay, Pakistan waxay si weyn ugu tiirsaneyd taageerada dalalka saaxiibada ah iyo dib u dhigista deymaha, si ay u xakameyso cadaadiska dhaqaale ee ka dhashay hoos u dhaca kaydka lacagaha qalaad iyo dhibaatooyinka isu-dheellitirka bixinta.
Tallaabadan ayaa loo arkaa mid muhiim u ah xasillinta dhaqaalaha Pakistan, iyadoo sidoo kale muujineysa xiriirka dhaqaale ee dhow ee kala dhexeeya dalalka Khaliijka
