Wararka24: Danjiraha cusub ee Jamhuuriyadda Federaalka Soomaaliya u fadhiya dalka Nigeria, Mohamed Osman Mohamed ayaa si rasmi ah waraaqaha aqoonsiga safiirnimo ugu gudbiyay Madaxweynaha Nigeria, Bola Ahmed Tinubu, xaflad ka dhacday xarunta madaxtooyada.
Madaxweynaha Nigeria ayaa si diirran u soo dhoweeyay safiirka cusub, isaga oo muujiyay sida ay dowladdiisu uga go’an tahay xoojinta xiriirka saaxiibtinimo iyo iskaashiga istiraatiijiyadeed ee kala dhexeeya Soomaaliya.
Tinubu ayaa carrabka ku adkeeyay muhiimadda ay leedahay in la ballaariyo wada-shaqeynta labada dal, gaar ahaan dhinacyada ganacsiga, amniga, horumarka waara iyo is-dhaafsiga dhaqanka.
Dhankiisa, danjire Mohamed Osman Mohamed ayaa uga mahadceliyay soo dhoweynta, isaga oo caddeeyay sida ay uga go’an tahay xoojinta xiriirka iyo iskaashiga u dhexeeya labada dowladood. Wuxuu sheegay inuu ka shaqeyn doono kobcinta iskaashi miro-dhal ah oo dan u ah labada shacab.
Safaaradda Soomaaliya ee Nigeria ayaa sidoo kale xustay in dowladda Soomaaliya ay sii xoojinayso xiriirrada diblomaasiyadeed ee ku dhisan ixtiraam is-dhaafsi ah, wada-shaqeyn wax-ku-ool ah iyo dan-wadaag.
Arrintan ayaa qeyb ka ah dadaallada ay Soomaaliya ku ballaarineyso xiriirrada caalamiga ah, iyadoo diiradda saaraysa iskaashi cusub oo ay la yeelato dalalka Afrika iyo kuwa kale ee dunida.
