Wararka24: Hoggaamiyaha ku meel gaarka ah ee Koonfur Galbeed Soomaaliya, Jibriil Cabdirashiid Xaaji Cabdi ayaa kulan la yeeshay Guddoomiyaha urur siyaasadeedka SINCAD, Maxamuud Khaliif Jabiye, oo uu wehliyay musharraxa xisbiga ee Koonfur Galbeed, Cabdifataax Maxamed Ibraahim Geesey.
Kulanka ayaa diiradda lagu saaray dardar-gelinta howlaha doorashooyinka dowlad-goboleedka Koonfur Galbeed, iyadoo la sheegay in ay socdaan dadaallo lagu diyaarinayo hannaan doorasho oo loo dhan yahay.
Hoggaamiye Jibriil ayaa ku ammaanay ururka SINCAD sida ay ugu diyaar garoobeen ka qeybgalka doorashada, isaga oo xusay muhiimadda ay leedahay in si wadajir ah looga shaqeeyo xasilloonida iyo maamul wanaagga Koonfur Galbeed.
Dhankiisa, Maxamuud Khaliif Jabiye ayaa uga mahadceliyay kulanka, isaga oo tilmaamay in guddiga doorashooyinka ay ku howlan yihiin sidii loo qaban lahaa doorasho degdeg ah oo hufan oo loo siman yahay.
Kulankan ayaa kusoo aadaya xilli ay sii kordhayaan dhaq-dhaqaaqyada siyaasadeed ee ka socda Koonfur Galbeed, iyadoo dhinacyada kala duwan ay isu diyaarinayaan doorashooyinka maamulkaasi.
