Wararka24: Hoggaamiyaha ku meel gaarka ah ee Dowlad Goboleedka Koonfur Galbeed, Jibriil Cabdirashiid Xaaji Cabdi, ayaa kormeer shaqo ku tagay xarunta maamulka degmada Baydhabo ee gobolka Baay.
Jibriil ayaa halkaasi waxaa ku soo dhaweeyay Guddoomiyaha degmada Baydhabo ahna duqa magaalada Cabdullaahi Cali Watiin.
Ujeedka kormeerkan ayaa ahaa hubinta habsami u socodka howlaha maamulka, dardargelinta adeegyada bulshada iyo xoojinta wada shaqeynta ka dhaxeysa maamulka iyo shacabka.
Intii uu kormeerka ku guda jiray, hoggaamiyaha ayaa warbixinno ka dhageystay masuuliyiinta degmada, kuwaas oo la wadaagay xaaladda guud iyo caqabadaha jira.
Sidoo kale, wuxuu indha indheyn ku sameeyay xarumo muhiim ah si uu u qiimeeyo heerka adeeg bixinta ee degmada.
Jibriil Cabdirashiid ayaa bogaadiyay maamulka degmada, isaga oo ku dhiirrigeliyay inay sii xoojiyaan hufnaanta, isla xisaabtanka iyo horumarinta adeegyada aas aasiga ah.
Wuxuu sidoo kale caddeeyay in maamulka Koonfur Galbeed ay ka go’an tahay horumarinta maamul wanaagga iyo kor u qaadidda adeegyada bulshada.
