Wararka24: Ra’iisul Wasaaraha Xukuumadda Federaalka Soomaaliya, Xamza Cabdi Barre, ayaa maanta si rasmi ah u daahfuray mashruuc loogu talagalay xoojinta adkeysiga magaalooyinka iyo is dhexgalka bulshooyinka barakacayaasha iyo kuwa martigeliya ee magaalada Doolow ee gobolka Gedo.
Mashruucan ayaa diiradda saaraya hagaajinta nolosha dadka nugul, gaar ahaan qoysaska barakacayaasha ah iyo bulshada martigelisa. Ra’iisul Wasaaraha ayaa sheegay in barnaamijkan uu door muhiim ah ka qaadan doono xoojinta nabadda, amniga iyo kobaca dhaqaalaha, isagoo carrabka ku adkeeyay in dowladda ay ka go’an tahay helitaanka xal waara oo lagu taageerayo dadka danyarta ah.
Xamza Cabdi Barre ayaa sidoo kale xusay in bulshada ku nool Doolow ay soo mareen dhibaatooyin ay ka mid yihiin abaaro iyo burbur soo jiitamayay muddo dheer, balse ay leeyihiin adkeysi iyo karti ay kaga gudbi karaan caqabadaha. Wuxuu tilmaamay in mashruucan uu yahay bilow cusub oo lagu gaari karo nolol ka wanaagsan tii hore.
Mashruuca ayaa la sheegay inuu xoogga saarayo la qabsiga isbeddelka cimilada iyo horumarinta adeegyada bulshada, iyadoo la fulinayo barnaamijyo dib-u-dejin, shaqo-abuur iyo xirfad-barid. Sidoo kale, waxaa qeyb ka ah horumarinta beeraha, xoolaha iyo ganacsiyada yaryar si loo kobciyo dhaqaalaha maxalliga ah.
Ugu dambeyn, xukuumadda ayaa sheegtay in mashruucan uu yahay mid ka mid ah dadaallada lagu xoojinayo adeegyada bulshada iyo horumarinta dhaqaalaha dalka, iyadoo si gaar ah diiradda loo saarayo dadka ay saameeyeen barakaca iyo duruufaha adag.
