Wararka24: Madaxweynaha Somaliland Cabdiraxmaan Maxamed Cabdillaahi (Cirro) ayaa maanta u ambabaxay Imaaraadka Carabta, isaga oo hoggaaminaya wafdi ballaaran oo ka tirsan xukuumaddiisa.
Safarka Madaxweynaha ayaa yimid kadib martiqaad rasmi ah oo uu ka helay dowladda Imaaraadka, xilli uu sii xoogeysanayo xiriirka u dhexeeya Somaliland iyo dalkaas Khaliijka ku yaalla.
Wafdiga uu hoggaaminayo Cirro ayaa waxaa ku jira wasiirro ka tirsan xukuumaddiisa, waxaana la filayaa inay kulamo la yeeshaan madaxda Imaaraadka, si looga wada hadlo arrimo istiraatiiji ah oo quseeya labada dhinac.
Madaxtooyada Somaliland ayaa sheegtay in safarkani yahay mid shaqo oo lagu xoojinayo xiriirka diblomaasiyadeed iyo iskaashiga u dhexeeya Hargeysa iyo Abu Dhabi, iyadoo diiradda la saarayo danaha labada dhinac.
Warbaahinta ku hadasha afka Somaliland ayaa tilmaamtay in safarkan uu muhiim u yahay horumarinta xiriirka caalamiga ah ee maamulka, inkastoo aan si rasmi ah loo shaacin ajandaha dhammeystiran ee kulamada.
Safarkan ayaa kusoo aadaya xilli ay jiraan isbeddello siyaasadeed oo ka socda gobolka, iyo sidoo kale dood ku saabsan xiriirka diblomaasiyadeed ee u dhexeeya Somaliland iyo dalalka Khaliijka.
