Wararka24: Warar soo baxaya ayaa sheegaya in Pakistan ay hub u dirtay maamulka bariga Liibiya ee uu hoggaamiyo Khalifa Haftar, iyadoo heshiiskaas ay maalgelinayso Sacuudi Carabiya.
Ilo Carbeed iyo Reer Galbeed ah oo xog-ogaal u ah arrintan ayaa sheegay in ugu yaraan shan diyaaradood oo xamuul ah ay bishii Maarso hub ka keeneen Pakistan, kuwaas oo laga dejiyay magaalada Benghazi. Mas’uul goobjoog ahaa ayaa xaqiijiyay in shixnadaha la dejiyay, inkastoo aan la faahfaahin nooca hubka.
Wakaaladda Reuters ayaa hore u sheegtay in maamulka bariga Liibiya uu Pakistan la galay heshiis hub oo lagu qiimeeyay 4 bilyan oo doollar, kaas oo noqday midkii ugu weynaa ee Pakistan la gasho dal Afrikaan ah.
Wararkan ayaa kusoo aadaya xilli uu jiro tartan sii xoogeysanaya oo u dhexeeya Sacuudiga iyo Imaaraadka Carabta oo labaduba saameyn ku leh gudaha Liibiya. Ilo-wareedyo ayaa tilmaamay in Riyadh ay dooneyso inay noqoto taageeraha ugu weyn ee Haftar, si ay uga riixdo saameynta Imaaraadka.
Mas’uuliyiin kale ayaa sheegay in tallaabadan ay sidoo kale la xiriirto dadaal lagu xakameynayo qulqulka hubka ee ka gudba xuduudaha Liibiya, gaar ahaan dhinaca Suudaan, halkaas oo dagaallo ay ka socdaan.
Si kastaba, shaki ayaa laga muujiyay sida uu heshiiskan u hirgeli karo, maadaama Haftar iyo qoyskiisu ay weli xiriir dhaqaale iyo mid istiraatiiji ah la leeyihiin Imaaraadka, oo muddo dheer taageerayay.
Dalka Liibiya ayaa weli u kala qeybsan laba maamul oo is haya: dowlad ay caalamku aqoonsan yihiin oo fadhigeedu yahay Tripoli, iyo maamulka bariga ee uu gacanta ku hayo Haftar. Inkastoo ay jirto cunaqabateyn hub oo ay saartay Qaramada Midoobay, haddana quwadaha shisheeye ayaa sii wada faragelinta.
Arrintan ayaa muujineysa loollan cusub oo ka dhex qarxaya dalalka Khaliijka, iyadoo Liibiya ay sii ahaaneyso goob istiraatiiji ah oo ay ku tartamayaan quwadaha gobolka.
