Wararka24: Senator Ted Cruz ayaa sheegay inuu rumeysan yahay in Madaxweynaha Donald Trump uu aqoonsan karo Somaliland ka hor inta uusan dhammaan muddo xileedkiisa.
Cruz ayaa hadalkan ka sheegay kulan ka dhacay Aqalka Senate-ka ee Mareykanka, isaga oo Somaliland ku tilmaamay saaxiib istaraatiiji ah oo muhiim u ah danaha Mareykanka ee Geeska Afrika. Wuxuu xusay doorka ay ka ciyaarto sugidda amniga marin-biyoodka Gacanka Cadmeed iyo la dagaallanka argagixisada iyo burcad-badeedda.
Senator-ka ayaa sidoo kale tilmaamay in Somaliland ay xiriir dhow la leedahay Taiwan iyo Israa’iil, taas oo uu sheegay inay kordhinayso muhiimaddeeda juqraafi iyo mid siyaasadeed.
Cruz ayaa sheegay inuu warqad u diray Trump oo uu kaga codsanayo aqoonsi rasmi ah. Wuxuu xusay in arrintan ay falcelin ka keentay Shiinaha, taas oo uu ku tilmaamay muujinaysa qiimaha istaraatiijiga ah ee Somaliland.
Dhanka kale, sarkaal ka tirsan Waaxda Arrimaha Dibadda Mareykanka, oo lagu magacaabo Nick Checker, ayaa sheegay in Washington ay weli ku taagan tahay siyaasaddeeda taageeraysa midnimada Soomaaliya.
Sarkaalkan ayaa intaas ku daray in Mareykanku sii xoojinayo xiriirka uu la leeyahay Somaliland, maadaama ay door ka ciyaarto xasilloonida gobolka, balse aysan jirin wax isbeddel rasmi ah oo ku yimid siyaasadda aqoonsiga.
Senator Cruz ayaa sidoo kale soo hadal qaaday suurtagalnimada heshiis difaac oo dhexmara Mareykanka iyo Somaliland, inkastoo arrintaas lagu sheegay mid u baahan qiimeyn dheeraad ah.
Hadalladan ayaa kusoo aadaya xilli ay sii xoogeysanayaan doodaha ku saabsan kaalinta Somaliland ee Geeska Afrika iyo tartanka quwadaha waaweyn ee gobolka.
