Wararka24: Maamulka Somaliland ayaa si kulul uga jawaabay cambaareyn ka timid Iiraan oo la xiriirta xidhiidhka diblomaasiyadeed ee u dhexeeya Somaliland iyo Israa’iil, gaar ahaan magacaabista wakiil diblomaasiyadeed.
Wasaaradda Arrimaha Dibadda Somaliland ayaa qoraal ay ku baahisay baraha bulshada ku sheegtay in Somaliland ay tahay maamul dimuqraadi ah oo xaq u leh inuu si madax-bannaan u go’aansado siyaasaddiisa arrimaha dibadda. Qoraalka ayaa sidoo kale lagu adkeeyay in xidhiidhka ay la leeyihiin Israa’iil uusan ahayn mid la wiiqi karo.
Dhanka kale, Wasaaradda Arrimaha Dibadda Iiraan ayaa si adag u cambaareysay tallaabada Israa’iil, iyadoo ku tilmaantay mid ka hor imaanaysa madax-bannaanida iyo midnimada dhuleed ee Soomaaliya.
Afhayeenka wasaaradda Iiraan Ismaaciil Baqa’i ayaa sheegay in arrintan ay qeyb ka tahay qorshe ballaaran oo lagu wiiqayo xasilloonida gobolka, isla markaana ay khatar ku tahay dalalka Islaamka.
Wuxuu sidoo kale xusay in Somaliland ay weli tahay qayb ka mid ah Soomaaliya, isaga oo ku dooday in tallaabada Israa’iil ay ka hor imaanayso shuruucda caalamiga ah iyo mabaadi’da Qaramada Midoobay.
Arrintan ayaa muujinaysa is-maandhaaf diblomaasiyadeed oo sii xoogeysanaya, kaas oo la xiriira xidhiidhka sii kordhaya ee Somaliland iyo Israa’iil, iyo jawaabaha kala duwan ee ka imanaya dalalka gobolka.
