Wararka24: Dalalka Yurub ayaa bilaabay qorshe istaraatiiji ah oo ay ku dhisayaan nidaam amni oo ka madaxbannaan NATO, iyadoo ay jirto cabsi sii kordheysa oo laga qabo in Mareykanka uu yareeyo ama joojiyo doorkiisa isbaheysiga. Qorshahan ayaa si dadban loogu naaneysay “NATO-da Yurub”.
Mas’uuliyiin ku lug leh qorshahan ayaa sheegay in ujeeddadu tahay in dalalka Yurub ay qaataan masuuliyad dheeraad ah oo ku saabsan difaacooda. Waxay tilmaameen in saraakiil Yurub ah loo diyaarinayo xilalka sare ee taliska, si loo hubiyo sii socoshada howlaha milatari.
Arrintan ayaa si gaar ah u xoogeysatay kadib hadallo ka soo baxay Madaxweynaha Mareykanka Donald Trump, oo muujinaya suurtagalnimada inuu ka baxo isbaheysiga. Hadalladaas ayaa sare u qaaday walaaca ku saabsan ku tiirsanaanta Yurub ee Mareykanka.
Hoggaamiyaha Jarmalka Friedrich Merz ayaa beddelay mowqifkii hore ee dalkiisa, isagoo taageeray in Yurub ay isku tashato dhanka amniga. Isbeddelkan ayaa horseeday iskaashi cusub oo dhex maray dalal ay ka mid yihiin Faransiiska, Ingiriiska iyo Poland.
Dalalka Yurub ayaa sidoo kale bilaabay inay kordhiyaan wax soo saarka qalabka milatari, gaar ahaan meelaha ay ka liitaan sida sirdoonka iyo difaaca badda. Qorshayaal cusub ayaa lagu horumarinayaa hubka casriga ah iyo teknoolojiyadda dagaalka.
Si kastaba, khubarada ayaa sheegay in caqabado waaweyn ay hortaagan yihiin hirgelinta qorshahan, maadaama NATO ay muddo dheer ku tiirsaneyd awoodda Mareykanka. Waxay tilmaameen in buuxinta kaalintaas ay u baahan doonto waqti iyo maalgashi weyn.
Arrinta ugu adag ayaa ah sidii Yurub ay u buuxin lahayd kaalinta hubka nukliyeerka iyo nidaamyada sirdoonka ee Mareykanka. Wadamo ay ka mid yihiin Faransiiska iyo Ingiriiska ayaa la filayaa inay door weyn ka qaataan arrintan.
Qorshahan cusub ayaa muujinaya isbeddel weyn oo ku yimid siyaasadda amniga Yurub, iyadoo dalalku isku dayayaan inay dhisaan awood difaac oo madax-bannaan.
