Wararka24: Ciidanka Booliska gaarka ah ee Haramcad ayaa si buuxda ula wareegay ammaanka magaalada Baydhaba kadib banaanbaxyo ka dhacay gudaha magaalada. Banaanbaxyadan ayaa la sheegay inay ka dhasheen diidmada isticmaalka shilinka Soomaaliga ah ee ay muujiyeen qaar ka mid ah ganacsatada.
Ciidamada ayaa howlgallo ka sameeyay xaafado kala duwan, iyaga oo la kulmay ganacsatada iyo bulshada si loo dejiyo xaaladda. Ujeeddada howlgalka ayaa ahayd in la xakameeyo xiisadda iyo in dib loo soo celiyo kala dambeynta magaalada.
Taliyaha ururka labaad ee guutada Haramcad Saxnuuni Cabdulqaadir Axmed ayaa hoggaaminayay howlgalka. Wuxuu ganacsatada ku amray inay furaan goobahooda ganacsi isla markaana ay qaataan lacagta shilinka Soomaaliga ah.
Sidoo kale, taliyaha ayaa sheegay in aan la aqbali karin diidmada lacagta qaranka, wuxuuna ka digay tallaabo laga qaadi doono cid kasta oo ka hor timaadda amarka dowladda. Hadalladiisa ayaa yimid iyadoo la isku dayayo in la xasiliyo xaaladda dhaqaale ee magaalada.
Howlgalkan ayaa kusoo aadaya xilli magaalada Baydhaba ay ka socdaan dhaqdhaqaaqyo siyaasadeed oo la xiriira doorashooyinka maamulka Koonfur Galbeed. Doorashooyinkan ayaa la filayaa inay saameyn ku yeeshaan jihada siyaasadeed ee maamulka.
Dowladda Federaalka Soomaaliya ayaa sidoo kale faragelin ku sameysay arrimaha maamulka, iyadoo la sheegay in isbeddel uu ku yimid hoggaanka hore. Arrintan ayaa sii kordhisay xiisadda siyaasadeed ee ka jirta deegaanka.
Xaaladda magaalada ayaa hadda u muuqata mid deggan, inkastoo ay weli socdaan kulamo siyaasadeed oo lagu diyaarinayo doorashooyinka soo socda. Ammaanka ayaa si dhow loola socdaa si looga hortago wax kasta oo carqaladeyn kara xasilloonida.
