Wararka24: Xisbiga Himilo Qaran ee uu hoggaamiyo madaxweynihii hore Shariif Sheekh Axmed ayaa digniin culus ka bixiyay dhammaadka muddo xileedka Baarlamaanka Federaalka Soomaaliya, oo ku ekaa 14-ka April 2026. Xisbiga ayaa arrintan ku tilmaamay mid halis gelin karta nidaamka dowladnimada dalka.
War-saxaafadeed kasoo baxay xisbiga ayaa lagu sheegay in dhammaadka muddada hay’adda sharci-dejinta uu dhaawac ku yahay geedi-socodka dowlad dhiska. Xisbiga ayaa xusay in Baarlamaanka uu yahay tiirka ugu muhiimsan ee sharciyadda dowladeed, isla markaana maqnaanshihiisu keeni karo jahwareer sharci iyo mid siyaasadeed.
Sidoo kale, xisbiga ayaa ka digay in haddii aan si degdeg ah xal loogu helin xaaladda, ay dhalan karto firaaq dastuuri ah ama muddo dhaaf sharci darro ah, taas oo sii wiiqi karta hay’adaha dowladda iyo kalsoonida shacabka.
Xisbiga Himilo Qaran ayaa sidoo kale walaac ka muujiyay tallaabooyin uu sheegay inay hal dhinac yihiin oo ay qaadeyso dowladda uu hoggaamiyo Xasan Sheekh Maxamuud, kuwaas oo ay ku tilmaameen kuwo khatar ku ah hannaanka siyaasadeed ee dalka.
Dhanka kale, siyaasiyiinta mucaaradka ah oo ay xulafo la yihiin maamul-goboleedyada Puntland iyo Jubaland ayaa fariimo u diray beesha caalamka, iyagoo ku baaqay in la kordhiyo cadaadiska diblomaasiyadeed si xal loogu helo muranka siyaasadeed.
Arrintan ayaa kusoo aadeysa xilli uu weli taagan yahay khilaaf xooggan oo ku saabsan nooca doorasho ee dalka loo jiheynayo iyo wax ka beddelka dastuurka Kumeel gaarka ah ee 2012.
Si kastaba, xaaladda siyaasadeed ee Soomaaliya ayaa wajahaysa marxalad xasaasi ah, iyadoo loo baahan yahay wadahadal iyo heshiis loo dhan yahay si looga fogaado qalalaase siyaasadeed oo hor leh.
