Wararka24: Golaha Golaha Mustaqbalka Soomaaliyeed ayaa si adag uga digay Madaxweynaha Soomaaliya Xasan Sheekh Maxamuud in ciidamada qalabka sida loo adeegsado dano siyaasadeed. Golaha ayaa sidoo kale fariin u diray ciidamada, iyagoo ku booriyay inay ilaaliyaan dhexdhexaadnimadooda.
War-saxaafadeed kasoo baxay golaha ayaa lagu sheegay in ay walaac ka qabaan dhaq-dhaqaaqyo ay sheegeen inay muujinayaan in hay’adaha amniga loo jiheynayo dano gaar ah. Golaha ayaa arrintan ku tilmaamay mid khatar gelin karta haykalka dowladnimada.
Golaha Mustaqbalka ayaa ciidamada ka dalbaday inay ka fogaadaan ku milanka siyaasadda, isla markaana ay iska diidaan amar kasta oo aan waafaqsanayn dastuurka iyo xeerarka ciidamada. Waxay sidoo kale ku adkeeyeen muhiimadda ilaalinta midnimada iyo sumcadda ciidanka qaranka.
Digniintan ayaa ku soo aadeysa xilli la xusayay sanad guurada 66aad ee aasaaska Ciidanka Xoogga Dalka Soomaaliyeed, iyadoo goluhu uu hambalyo u diray dhammaan xubnaha ciidamada. Waxay xuseen in waajibaadka ciidanka uu yahay difaaca qaranka iyo sugidda amniga shacabka.
Golaha ayaa sidoo kale ku baaqay in laga fogaado kala qeybsanaanta ciidanka, iyagoo tilmaamay in ku saleynta xilalka dano gaar ah ay wiiqi karto awoodda ciidanka. Waxay carrabka ku adkeeyeen in ciidanku yahay tiirka ugu muhiimsan ee dowladnimada.
Dowladda Federaalka Soomaaliya ayaan wali si rasmi ah uga hadlin eedeymaha iyo digniinta kasoo baxday Golaha Mustaqbalka. Arrintan ayaa imaneysa xilli ay jiraan doodo siyaasadeed oo ku saabsan amniga iyo maamulka dalka.
