Wararka24: In ka badan 256,000 oo codbixiye ayaa maanta u dareeray codbixinta doorashada madaxtooyada ee ka dhacaysa Jabuuti, iyadoo si weyn loo saadaalinayo in uu mar kale guulaysan doono madaxweynaha xilka haya Ismaaciil Cumar Geelle. Doorashadan ayaa timid xilli uu Geelle doonayo inuu markiisii lixaad sii hoggaamiyo dalka.
Codbixinta ayaa si rasmi ah u bilaabatay saaka, waxaana la sheegay in ka qeybgalka uu ahaa mid kala duwan saacadihii hore. Goobaha qaar ayaa dib u dhac ku yimid furitaankooda, halka meelo kale ay si tartiib ah shaqo u bilaabeen, gaar ahaan gudaha caasimadda.
Madaxweynaha xilka haya ayaa wajahaya hal musharrax oo keliya, Maxamed Faarax Samatar, oo hoggaamiya xisbiga mucaaradka ah. Xisbigaas ayaan wax kursi ah ku lahayn baarlamaanka, taas oo muujinaysa farqiga awoodda siyaasadeed ee labada dhinac.
Ismaaciil Cumar Geelle ayaa talada dalka hayay tan iyo sanadkii 1999, markaas oo uu xilka kala wareegay madaxweynihii hore Xasan Guuleed Abtidoon. Doorashadii ugu dambeysay ee 2021 ayuu ku guuleystay boqolkiiba sare oo codad ah, taas oo sii xoojisay joogitaankiisa siyaasadeed.
Dhinaca kale, ururo xuquuqda aadanaha ayaa walaac ka muujiyay heerka xorriyadda siyaasadeed, iyagoo ku eedeeyay dowladda inay xaddiday dhaqdhaqaaqa mucaaradka. Dowladda ayaa si cad u diiday eedeymahaas, waxayna ku adkeysatay in doorashadu u socoto si hufan.
Doorashadan waxaa kormeeraya hay’ado caalami ah oo ay ka mid yihiin Midowga Afrika, Ururka Iskaashiga Islaamka iyo Jaamacadda Carabta, kuwaas oo la socda habsami u socodka codbixinta.
Natiijooyinka hordhaca ah ee doorashada ayaa la filayaa in la shaaciyo saacadaha soo socda ama subaxda xigta, sida ay sheegeen guddiga doorashooyinka dalka.
DAAWA
