Wararka24: Dowladda Sweden ayaa ku dhawaaqday istaraatiijiyad cusub oo saddex sano ah oo ay ku taageereyso Soomaaliya, taas oo qiimaheedu gaarayo ku dhowaad $65 milyan.
Qorshahan oo socon doona inta u dhaxeysa 2026 ilaa 2028 ayaa diiradda lagu saarayaa dhismaha hay’adaha dowladda, kobcinta dhaqaalaha iyo xoojinta u adkeysiga dhibaatooyinka.
Mas’uuliyiinta Sweden ayaa sheegay in taageeradan ay sidoo kale la xiriirto ujeeddo cusub oo ku saabsan arrimaha socdaalka.
Wasiirka Iskaashiga Horumarinta Caalamiga ah iyo Ganacsiga Dibadda, Benjamin Dousa, ayaa sheegay in istaraatiijiyaddan ay ka qeyb qaadaneyso horumarinta dowladnimada iyo shaqo abuurka.
Dowladda Sweden ayaa caddeysay in qorshahan uu isku xirayo gargaarka horumarineed iyo siyaasadda socdaalka, gaar ahaan dib u celinta dadka aan sharciga ku joogin.
Wararka ayaa tilmaamaya in horey shuruudo la mid ah loogu xiray taageerada, oo ay ka mid tahay aqbalidda muhaajiriinta dib loogu soo celinayo Soomaaliya.
Hay’ada Folke Bernadotte Academy ayaa la sheegay inay fulin doonta qorshahan cusub.
Tallaabadan ayaa muujineysa isbeddel ku yimid siyaasadda gargaarka Sweden, iyadoo xoogga la saarayo isku filnaanshaha, kobaca dhaqaalaha iyo maareynta socdaalka.
