Wararka24: Hantidhowraha Guud ee Jamhuuriyadda Federaalka Soomaaliya, Axmed Ciise Gutaale, ayaa kulan la yeeshay Safiirka Turkiga u fadhiya Soomaaliya, Danjire Alper Aktaş.
Kulankan ayaa diiradda lagu saaray fulinta heshiiska is-fahamka ah ee u dhexeeya Maxkamadda Xisaabaadka Turkiga iyo Xafiiska Hantidhowrka Guud ee Soomaaliya.
Heshiiskan oo la saxiixay bishii July 2025 ayaa ku saabsan iskaashi lagu horumarinayo aqoonta iyo xirfadaha la xiriira hantidhowrista.
Axmed Ciise Gutaale ayaa kulanka ka sheegay muhiimadda uu heshiiskan u leeyahay xoojinta hufnaanta iyo isla xisaabtanka hay’adaha dowladda.
Sidoo kale, wuxuu tilmaamay doorka ay hay’adda TIKA iyo Safaaradda Turkiga ka qaadanayaan hirgelinta heshiiskaasi.
Dhankiisa, Danjire Alper Aktaş ayaa muujiyay sida ay uga go’an tahay dowladda Turkiga taageerada wada-shaqeynta iyo horumarinta hay’adaha hantidhowrka Soomaaliya.
Wuxuu xusay in xoojinta hantidhowrka ay muhiim u tahay horumarinta dowlad wanaagga iyo daahfurnaanta maaliyadeed.
