Wararka24: Maamulka Koonfur Galbeed ayaa hoos u dhigay walaaca laga muujiyay ciidamada iyo gaadiidka dagaalka ee ku sugan duleedka magaalada Baydhaba, isagoo sheegay in ciidamadu yihiin kuwo sugaya amniga.
Afhayeenka maamulka, Ugaas Xasan Cabdi Maxamed, ayaa sheegay in ciidamadaasi aanay ahayn kuwo fallaagoobay, balse loo dhigay bannaanka si looga hortago qalalaase ka dhaca hareeraha magaalada.
Wuxuu xusay in dagaalkii ka dhacay gudaha Baydhaba uu sababay in ciidamada loo kala fogeeyo, si loo xasiliyo xaaladda amni ee magaalada iyo nawaaxigeeda.
Hadalkan ayaa imanaya kadib markii warar hore ay sheegayeen in ciidamo taabacsan madaxweynihii hore Cabdicasiis Lafta-gareen ay ku sugan yihiin bannaanka Baydhaba.
Afhayeenka ayaa sidoo kale tilmaamay in dagaalkii dhacay uu ahaa mid la filan karayay, balse dhinacooda ay qaadeen tallaabooyin lagu kala badbaadinayo ciidamada.
Dhanka kale, weli waxaa taagan hadal heyn ku saabsan mowqifka Lafta-gareen, kaas oo lagu sheegay inuu iscasilay, inkastoo warar kale ay sheegayaan inuu weli ku adkeysanayo xilka.
Si kastaba, afhayeenka maamulka ayaa ka gaabsaday inuu si cad uga hadlo arrintaas, isagoo sheegay in go’aankaasi uu yahay mid u gaar ah Lafta-gareen.
