Wararka24: Hoggaamiyaha militariga ee Burkina Faso, Ibrahim Traoré, ayaa sheegay in shacabka dalkiisa ay iska illaawaan dimuqraadiyadda, isagoo xusay in nidaamkaas uusan ku habboonayn xaaladda dalka.
Traoré ayaa hadalkan ka jeediyay wareysi uu siiyay telefishinka qaranka, isagoo cadeeyay in aan hadda laga hadli karin doorashooyin.
“Dadku waa inay iska illaawaan dimuqraadiyadda, annaga nooma fiicna,” ayuu yiri.
Hoggaamiyahan ayaa talada dalka ku qabsaday afgambi dhacay sanadkii 2022, tan iyo markaasna waxaa la sheegay inuu xoojiyay xakameynta mucaaradka.
Wararka ayaa sheegaya in la kala diray guddigii doorashooyinka, isla markaana baarlamaanka militariga uu baabi’iyay axsaabtii siyaasadeed.
Xisbiyada siyaasadeed ayaa horey loo hakiyay kadib afgambiga, iyadoo tallaabooyinkan ay sii adkeeyeen cadaadiska siyaasadeed ee dalka.
Burkina Faso ayaa muddo sanado ah wajahaysay weerarro ay geystaan kooxo hubeysan, kuwaas oo sababay khasaare weyn oo naf iyo maalba leh.
Militariga ayaa ku sababeeyay dib u dhaca doorashooyinka xaaladda amni darro, iyagoo muddada kala guurka ah ku kordhiyay shan sano oo dheeraad ah.
Qaramada Midoobay ayaa ku baaqday in la joojiyo cadaadiska siyaasadeed iyo in dib loo soo celiyo nidaamka dimuqraadiyadeed.
