Wararka24: Madaxweynaha Mareykanka Donald Trump ayaa la sheegay inuu qorsheynayo inuu soo afjaro ololaha militari ee ka socda Iiraan, xilli weli ay xiran tahay marin biyoodka Hormuz.
Sida lagu sheegay warbixin, Trump ayaa u sheegay la taliyayaashiisa inuu diyaar u yahay joojinta dagaalka, inkastoo aan weli la furin marinka muhiimka ah ee Hormuz.
Saraakiil ka tirsan maamulka Mareykanka ayaa sheegay in qiimeyn la sameeyay ay muujisay in howlgal lagu jebinayo xannibaadda marinka uu qaadan karo waqti ka dheer qorshaha hore ee dagaalka.
Go’aankan ayaa la rumeysan yahay inuu Iran u ogolaan karo inay sii haysato gacan ku haynta marinka, iyadoo Washington ay diiradda saareyso yoolal kale oo militari iyo cadaadis diblomaasiyadeed.
Wararka ayaa sidoo kale tilmaamaya in Mareykanka uu qorsheynayo inuu xulafadiisa Yurub iyo dalalka Khaliijka ku dhiirrigeliyo inay hoggaanka u qabtaan dadaallada lagu furayo marinka Hormuz.
Trump ayaa hore u sheegay in marinkaasi aanu muhiim weyn u ahayn Mareykanka marka loo eego dalal kale, taas oo ka duwan hanjabaadihii hore ee uu ku doonayay in si militari loo furo.
Xirnaanshaha Hormuz ayaa saameyn weyn ku yeeshay dhaqaalaha caalamka, iyadoo qiimaha shidaalka uu si weyn u kordhay.
Falanqeeyayaal ayaa ka digaya in haddii aan xal degdeg ah la helin, ay sii socon karto carqaladda ganacsiga caalamiga ah iyo kororka qiimaha tamarta.
