Wararka24: Isbeddel ku yimid istaraatiijiyadda milateri ee Mareykanka, oo diiradda saartay dagaalka Iiraan, ayaa si dadban u saameeyay la dagaallanka Daacish ee Soomaaliya, sida lagu sheegay warbixin cusub.
Warbixinta ayaa tilmaamaysa in yaraanta duqeymaha cirka iyo taageerada milateri ay fursad siisay kooxdan inay dib isu abaabusho, kadib markii ay hore u la kulantay khasaare xooggan.
Saraakiil amni oo Soomaali ah ayaa sheegay in hoos u dhaca hawlgallada uu sababay in xubnaha Daacish ay ka soo baxaan godadkii ay ku dhuumaaleysanayeen, isla markaana ay dib u bilaabaan weerarro ka dhan ah deegaanno ku yaalla Puntland.
Wararka ayaa sidoo kale muujinaya in dagaalyahanno hore uga baxsaday cadaadiska militari ay dib ugu soo laabanayaan gudaha Soomaaliya, iyagoo si qarsoodi ah ugu biiraya kooxo yaryar.
Sidoo kale, Soomaaliya ayaa lagu tilmaamay inay noqotay xarun muhiim u ah hawlgallada iyo dhaqaalaha Daacish, iyadoo la sheegay in halkaas laga maamulo shabakado caalami ah oo xiriir la leh weerarro ka dhacay dalal kale.
Falanqeeyayaal ayaa ka digay in diiradda milateri ee Mareykanka oo loo weeciyo Bariga Dhexe ay abuuri karto firaaq amni oo kooxaha xagjirka ah ka faa’iideystaan.
Si kastaba, taliska AFRICOM ayaa sheegay in ay weli ka go’an tahay taageerada Soomaaliya, isla markaana ay sii wadi doonaan hawlgallada ka dhanka ah Daacish.
