Wararka24: Hoggaamiyaha Xuutiyiinta Yemen Cabdulmaalik Al Xuuti ayaa sheegay in kooxdiisu aysan dhex dhexaad ka ahayn dagaalka u dhexeeya Iiraan, Mareykanka iyo Israa’iil, isla markaana ay qaadi karto tallaabooyin milateri.
Khudbad uu ka jeediyay telefishinka Al Masirah ayuu ku sheegay in mowqifkoodu uu ku saleysan yahay taageerada ay u hayaan waxa uu ku tilmaamay danaha ummadda Islaamka.
Wuxuu sheegay in isbeddel kasta oo ka dhaca xaaladda dagaalka uu keeni karo jawaab milateri oo ka timaada Xuutiyiinta, haddii ay arkaan in ay lagama maarmaan tahay.
Hoggaamiyaha ayaa sidoo kale ku eedeeyay Mareykanka iyo Israa’iil inay wiiqeen xasilloonida gobolka, isaga oo duqeymaha ka dhanka ah Iiraan ku tilmaamay kuwo aan qiil lahayn.
Xuutiyiinta oo taageero ka hela Iiraan ayaa horey u qaaday weerarro gantaallo iyo diyaarado aan duuliye lahayn ah oo ay la beegsadeen Israa’iil iyo maraakiibta ganacsiga ee Badda Cas.
Digniintan ayaa kusoo beegmeysa xilli uu sii xoogeysanayo dagaalka Bariga Dhexe, iyadoo ay socdaan weerarro isdaba joog ah oo u dhexeeya dhinacyada isku haya gobolka.
Xaaladda ayaa weli cakiran, waxaana sii kordhaya walaaca laga qabo in colaadda ay ku fido dalal kale oo badan.
