Wararka24: Falanqeeye dhanka amniga ah oo u dhashay Iiraan ayaa sheegay in dalkiisu diyaar u yahay tallaabooyin milateri oo ka dhan ah dalalka Khaliijka haddii xiisadda gobolka ay sii kororto.
Morteza Simiari ayaa wareysi uu siiyay telefishinka dowladda Iiraan ku sheegay in ciidamada Tehran ay qaadi karaan tallaabooyin ay ku beegsanayaan xeebaha Imaaraadka Carabta iyo Baxreyn haddii Mareykanku sameeyo waxa uu ku tilmaamay khalad istaraatiiji ah.
Hadalka falanqeeyaha ayaa kusoo aadaya xilli ay sii kacsan tahay xiisadda u dhexeysa Iiraan iyo xulafada Mareykanka ee gobolka, iyadoo ay jiraan weerarro isdaba joog ah oo labada dhinac ay isku qaadayaan.
Dhanka kale, mas’uuliyiin ka tirsan Imaaraadka Carabta ayaa si adag u cambaareeyay weerarrada Iiraan, iyagoo sheegay in aysan aqbali doonin wax khatar ah oo ku wajahan amniga dalkooda.
Wararka ayaa tilmaamaya in dalalka Khaliijka ay xoojinayaan iskaashiga amniga ee ay la leeyihiin Mareykanka, si ay uga hortagaan khataraha ka iman kara xiisadda sii kordheysa.
Sidoo kale, waxaa jira warar sheegaya in qaar ka mid ah dalalka gobolka ay isu diyaarinayaan xaalad dagaal oo sii dheeraata, iyadoo laga cabsi qabo in colaaddan ay sii fido.
Si kastaba, hadalladan ayaa ah kuwo ka yimid falanqeeye, mana jirto illaa hadda wax xaqiijin rasmi ah oo muujinaya qorshe milateri oo noocan ah oo ay dowladda Iiraan si cad u shaacisay.
