Wararka24: Xildhibaan Ilhaan Cumar oo ka tirsan Koongareeska Mareykanka ayaa si adag u cambaaraysay weerarrada Israa’iil ka waddo Lubnaan, iyadoo ku baaqday in si degdeg ah loo joojiyo colaadda sii fidaysa.
Ilhaan Cumar ayaa sheegtay in duqeymahaasi aysan ahayn kuwo kadis ah, balse ay ka dhasheen dagaal ballaaran oo ka socda gobolka, kaas oo ay ku lug leeyihiin quwado waaweyn.
Waxay xustay in weerarradaasi ay sababeen khasaare ballaaran, oo ay ku jiraan dhimasho iyo dhaawac, iyo barakac ku yimid dad badan oo rayid ah.
Xildhibaanadda ayaa ugu baaqday Koongareeska Mareykanka inuu qaado tallaabooyin degdeg ah si loo joojiyo dagaalka loona yareeyo dhibaatada bani’aadantinimo.
Hadalkeeda ayaa kusoo aadaya xilli ay sii xoogeysanayaan xiisadaha u dhexeeya Iiraan, Israa’iil iyo Mareykanka, iyadoo eedeymo iyo hadallo is khilaafsan ay ka imanayaan dhinacyada.
Qaramada Midoobay ayaa dhankeeda ka digtay xaalad bani’aadantinimo oo sii xumaaneysa oo ka jirta Lubnaan, iyadoo sheegtay in dad badan ay ka barakaceen guryahooda.
Dhanka kale, duqeymo iyo weerarro is dhaafsi ah ayaa weli ka socda gobolka, iyadoo la sheegay in dhinacyada ay sii wadaan hawlgallada militari.
