Wararka24: Wargeyska The New York Times ayaa sheegay in hay’adda sirdoonka Israa’iil ee Mossad ay soo bandhigtay qorshe ku saabsan kicinta kacdoon gudaha Iiraan, kaas oo la sheegay inuu saameyn ku yeeshay go’aanada siyaasadeed ee Mareykanka.
Warbixinta ayaa xustay in Agaasimaha Mossad David Barnea uu la wadaagay qorshahan mas’uuliyiin sare oo Israa’iiliyiin iyo Mareykan ah, isagoo sheegay in la abuuri karo kacdoon shacabka dhexdiisa ah oo horseedi kara isbeddel siyaasadeed.
Sida lagu sheegay warbixinta, qorshahan ayaa helay taageero siyaasadeed, inkastoo ay jireen shaki ay muujiyeen qaar ka mid ah saraakiisha sirdoonka iyo militariga.
Warbixinta ayaa sidoo kale tilmaantay in markii dagaalku bilowday, aysan jirin calaamado muujinaya kacdoon ballaaran oo gudaha Iiraan ka dhacay, taasoo meesha ka saartay rajadii la qabay.
Hay’adaha sirdoonka Mareykanka ayaa lagu sheegay inay qiimeeyeen in nidaamka Iiraan uusan si fudud u burburi doonin, isla markaana isbeddel degdeg ah uusan dhici doonin.
Sidoo kale, warbixinta ayaa xustay in saraakiil Mareykan ah ay ka digeen in shacabka Iiraan aysan u badaneyn inay kacaan xilli ay socoto colaadda.
Arrintan ayaa muujineysa khilaaf ku saabsan qiimeynta istaraatiijiyadda dagaalka iyo saameynta ay ku yeelan karto xaaladda gobolka.
