Wararka24: Madaxweynaha Dowlad Goboleedka Koonfur Galbeed Cabdicasiis Xasan Maxamed Lafta-gareen ayaa magacaabay guddiga xuduudaha iyo doorashooyinka, xilli uu jiro khilaaf siyaasadeed oo u dhexeeya maamulkaasi iyo Dowladda Federaalka Soomaaliya.
Guddigan oo ka kooban sagaal xubnood ayaa guddoomiye looga dhigay Shuceyb Nuur Xuseen, waxaana la faray inay si degdeg ah u bilaabaan howlaha la xiriira diyaarinta doorashooyinka.
Ujeedada guddigan ayaa ah abaabulka doorashada golaha wakiillada iyo midda madaxweynaha Koonfur Galbeed, arrimahaas oo haatan muran ka taagan yahay.
Tallaabadan ayaa kusoo aadeysa iyadoo xiisadda u dhexeysa Dowladda Federaalka iyo maamulka Koonfur Galbeed ay sare u kacday, isla markaana ay jiraan isku dhacyo iyo eedeymo is dhaafsi ah.
Dowladda Federaalka ayaa horay u sheegtay in Lafta-gareen aanu lahayn sharciyad buuxda, waxayna ku baaqday in la ilaaliyo joogteynta maamulka heer gobol iyo degmo.
Wasaaradda arrimaha gudaha ayaa sidoo kale xustay muhiimadda ay leedahay in laga hortago firaaq maamul iyo in la ilaaliyo adeegyada bulshada inta xal laga gaarayo xaaladda.
Xiisadda siyaasadeed ee labada dhinac ayaa weli taagan, iyadoo ay jiraan dhaq dhaqaaqyo ciidan oo muujinaya in xaaladdu ay weli tahay mid kacsan.
