Wararka24: Wasiirada arrimaha dibadda ee Turkiga, Sacuudi Carabiya, Masar iyo Pakistan ayaa kulan xasaasi ah ku yeeshay magaalada Riyadh, iyagoo ka tashanaya xoojinta iskaashi amni iyo militari oo dhexmara dalalkooda.
Kulankan ayaa kusoo aaday xilli uu socday shir madaxeed ay yeesheen dalalka Islaamka, waxaana lagu falanqeeyay sida loo mideyn karo awoodaha kala duwan ee ay dalalkan leeyihiin si loo wajaho xaaladaha amni ee sii adkaanaya.
Ilo wareedyo ayaa sheegaya in qorshahan uu socday muddo, iyadoo Turkiga uu hormuud ka ahaa dadaallada lagu dhisayo iskaashi ballaaran oo ay ku mideysan yihiin dalalkaasi.
Wasiirka arrimaha dibadda Turkiga Hakan Fidan ayaa sheegay in ay muhiim tahay in dalalka gobolka ay si wadajir ah uga shaqeeyaan xallinta dhibaatooyinka taagan, halkii ay ku tiirsanaan lahaayeen quwado shisheeye.
Wuxuu sidoo kale tilmaamay in wada hadallada ay diiradda saareen xaaladaha cakiran ee gobolka, oo ay ku jiraan xiisadaha ka dhashay dagaalka u dhexeeya Iiraan iyo xulafada Mareykanka iyo Israa’iil.
Inkasta oo wada hadalladu ay ku saabsan yihiin iskaashi amni, haddana lama filayo in isbahaysigan uu noqdo mid la mid ah gaashaanbuur rasmi ah, balse uu fududeyn doono iskaashi ku saabsan difaaca iyo warshadaha militari.
Dalalkan ayaa leh awoodo kala duwan oo is kaabaya, iyadoo Turkiga uu hormuud ka yahay warshadaha difaaca, Pakistan ay leedahay awood nukliyeer, Sacuudiga uu hormarinayo teknoolojiyadda, halka Masar ay leedahay awood militari oo ballaaran.
Dadaalladan ayaa muujinaya isbeddel ku yimid siyaasadda gobolka, iyadoo dalalkaasi ay doonayaan inay si wadajir ah uga jawaabaan caqabadaha amni ee sii kordhaya.
