Wararka24: Xiddigaha Xulka Qaranka Soomaaliya ee kubadda cagta ayaa maanta ka ambabaxay garoonka Aadan Cadde ee Muqdisho, iyagoo ku sii jeeda caasimadda Mozambique ee Maputo.
Safarka xulka ayaa qeyb ka ah diyaar garowga kulanka ay la ciyaari doonaan dhigooda Mauritius, kaas oo ka tirsan wareegyada hordhaca ah ee isreeb reebka tartanka AFCON 2027.
Ciyaartan oo la qorsheeyay inay dhacdo 27-ka bishan ayaa muhiim u ah rajada Soomaaliya ee u soo bixista tartanka Qaramada Afrika, iyadoo ciyaartoydu ay muujiyeen kalsooni iyo diyaar garow wanaagsan.
Xiddigaha Ocean Stars ee safarka galay ayaa laga soo xulay gudaha dalka, waxaana la filayaa inay halkaas kula midoobaan ciyaartoyda ka imaaneysa dibadda.
Tababaraha xulka Yuusuf Cali Nuur ayaa horey u shaaciyay liiska ciyaartoyda, isagoo ku booriyay inay muujiyaan dadaal iyo isku duubni si ay u gaaraan natiijo wanaagsan.
