Wararka24: Dowladda Sacuudi Carabiya ayaa oggolaatay inay Mareykanka u furto saldhig ciidan oo dhanka cirka ah oo ku yaalla galbeedka dalkaas, tallaabadaas oo muujinaysa isbeddel ku yimid mowqifkeeda ku aaddan dagaalka ka dhanka ah Iiraan sida ay so warisay wkalada Iran international
Go’aankan ayaa yimid kadib wada hadallo heer sare ah oo dhexmaray saraakiil Mareykan ah iyo Wasiirka Gaashaandhigga Sacuudiga Amiir Khalid bin Salman, kuwaas oo ku heshiiyay in la ballaariyo isticmaalka hawada iyo joogitaanka militariga Mareykanka.
Mas’uuliyiin reer Galbeed ah ayaa sheegay in saldhigga cusub uu yahay kan Boqor Fahad ee magaalada Taif, kaas oo leh muhiimad istiraatiiji ah maadaama uu ka fog yahay halista weerarada gantaallada iyo diyaaradaha aan duuliyaha lahayn.
Tallaabadan ayaa kusoo aadeysa iyadoo dagaalka u dhexeeya Mareykanka, Israa’iil iyo Iiraan uu galay toddobaadkiisii afaraad, isla markaana uu sii kordhayo cadaadiska amni ee ka jira gobolka Khaliijka.
Wararka ayaa sidoo kale tilmaamaya in kumanaan ka tirsan ciidamada Mareykanka ay u socdaan Bariga Dhexe, iyadoo la xoojinayo awoodda milatari ee Washington ee gobolka.
Isbeddelka mowqifka Sacuudiga ayaa la sheegay inuu ka dhashay weerarro ay Iiraan ku qaaday gudaha dalkaasi iyo xarumo muhiim ah oo tamar, kuwaas oo kordhiyay walaaca amni.
Dalalka Khaliijka ayaa hore uga soo horjeeday in dhulkooda loo adeegsado weerarro ka dhan ah Iiraan, balse xaaladda cusub ayaa keentay in dib loo eego siyaasadaha amni iyo iskaashiga milatari.
Xiisadda gobolka ayaa weli taagan, iyadoo falanqeeyayaal ay sheegayaan in Sacuudiga uu isku dayayo inuu dheellitiro ka hortagga Iiraan iyo ka fogaanshaha dagaal toos ah oo baaxad leh.
