Wararka24: Xiriirka u dhexeeya Jamhuuriyadda Federaalka Soomaaliya iyo Boqortooyada Sacuudi Carabiya ayaa galay marxalad cusub oo muujinaysa isu soo dhawaansho dhinacyada diblomaasiyadda, amniga iyo dhaqaalaha, kadib tallaabooyin isdaba joog ah oo ay qaadeen labada dal bilihii la soo dhaafay.
Isbeddelkan ayaa si gaar ah uga muuqday mowqifka cad ee Riyadh ee ku saabsan taageerada midnimada iyo wadajirka dhuleed ee Soomaaliya, iyo sidoo kale heshiisyo cusub oo dhinaca difaaca iyo gaadiidka badda ah oo ay kala saxiixdeen labada dowladood.
9-kii Febraayo, Wasiirka Gaashaandhigga Soomaaliya Axmed Macallin Fiqi iyo dhiggiisa Sacuudiga Amiir Khalid bin Salman ayaa magaalada Riyadh ku kala saxiixday is-afgarad milatari oo la xiriira tababar, taageero farsamo iyo xoojinta iskaashiga dhinaca amniga.
Wax yar kadib, labada dhinac ayaa sidoo kale kala saxiixday heshiis la xiriira gaadiidka badda iyo horumarinta dekedaha, kaas oo lagu doonayo in lagu kordhiyo isku socodka ganacsiga iyo rakaabka, isla markaana kor loogu qaado doorka dekedaha Soomaaliya ee ganacsiga gobolka.
Dhanka diblomaasiyadda, Wasaaradda Arrimaha Dibadda Sacuudiga ayaa sidoo kale si rasmi ah u aqbashay safiirka cusub ee Soomaaliya u fadhiya boqortooyada, Maxamed Amiin Sheekh Cusmaan, taas oo muujinaysa dib u soo celinta xiriir toos ah oo heer sare ah oo u dhexeeya labada dowladood.
Mas’uuliyiinta Soomaaliya ayaa xiriirkan cusub u arka mid muhiim u ah xoojinta awoodda ciidamada dalka, horumarinta dhaqaalaha iyo kordhinta taageerada gobolka ee la dagaallanka kooxaha hubeysan.
