Wararka24: 2-02-2026 Wasaaradda Difaaca Kuwait ayaa xaqiijisay in tiro ka mid ah diyaaradaha dagaalka ee nooca F-15 ee Mareykanka ay ku burbureen gudaha dalkaas, xilli xiisad milatari ay ka taagan tahay gobolka.
Bayaan rasmi ah oo kasoo baxay wasaaradda ayaa lagu sheegay in diyaaradahaasi ay soo dhaceen, balse aanay jirin wax khasaare nafeed ah.
Duuliyeyaasha ayaa la sheegay in si degdeg ah loo daadgureeyay loona qaaday isbitaallo si loogu sameeyo baaritaanno caafimaad, iyadoo xaaladdooda lagu tilmaamay mid deggan.
Dowladda Kuwait ayaa sidoo kale sheegtay inay la shaqaynayso Mareykanka si loo ogaado duruufaha ku xeeran dhacdada iyo sababaha keenay burburka diyaaradaha. Baaritaan rasmi ah ayaa la sheegay inuu socdo.
Muuqaallo lagu faafiyay baraha bulshada ayaa muujinaya mid ka mid ah duuliyeyaasha oo kusoo degay baarashuud, ka hor inta aan la gaarin goobta ay ku sugan yihiin laamaha amniga Kuwait. Wararka ayaa tilmaamaya in ciidamada ammaanku ay si nabad ah ula wareegeen duuliyaha.
Dhacdadan ayaa kusoo beegmeysa xilli dalal ka tirsan Khaliijka ay wajahayaan weerarro la xiriira xiisadda sii kordheysa ee u dhexeysa Iiraan iyo isbahaysiga Mareykanka iyo Israa’iil, iyadoo xaaladda amni ee gobolka ay weli tahay mid kacsan.
