Wararka24: 1-02-2026 Dowladda Federaalka Soomaaliya ayaa sheegtay in howlgallo qorsheysan oo ka dhacay gobollada Hiiraan iyo Shabeellaha Dhexe lagu fashiliyay abaabul ay Al-Shabaab ka wadeen laba gobol, isla markaana lagu gaarsiiyay jab culus.
Howlgalladan ayaa la sheegay in ay iska kaashadeen Ciidanka Hay’adda Sirdoonka iyo Nabadsugidda Qaranka (NISA) iyo saaxiibada caalamiga ah.
Warsaxaafadeed kasoo baxay NISA ayaa lagu sheegay in in ka badan 40 xubnood oo ka tirsan Al-Shabaab lagu dilay howlgalladaasi. Qoraalka ayaa xusay in ciidamada ay beegsadeen maleeshiyaad abaabul iyo dhaqdhaqaaqyo dagaal ka waday deegaanno ka tirsan Hiiraan iyo Shabeellaha Dhexe.
Howlgal ka dhacay aagga Waab-weyn iyo isgoyska Madaxyo-weyn ee hoostaga degmada Maxaas ayaa lagu sheegay in lagu dilay 17 xubnood, laguna burburiyay goobo ay ku sugnaayeen.
Sidoo kale, howlgal kale oo ka dhacay howdka deegaanka Buulo-naagey ayaa lagu sheegay in lagu soo afjaray 23 xubnood oo lagu tuhmay inay qorsheynayeen falal amni darro.
NISA ayaa sheegtay in ay sii xoojin doonto dadaallada lagula dagaallamayo Al-Shabaab, iyadoo ku boorrisay shacabka inay la wadaagaan macluumaad kasta oo la xiriira amniga.
Maalmihii u dambeeyay, dowladda iyo saaxiibada caalamiga ah ayaa kordhiyay howlgallada ka dhanka ah kooxda, iyadoo dhowaan howlgal ka dhacay Saakow lagu sheegay in lagu dilay hoggaamiye sare oo ka tirsanaa Al-Shabaab.
Ilaa hadda, ma jiro war ka soo baxay Al-Shabaab oo ku saabsan sheegashada dowladda ee khasaaraha la gaarsiiyay.
