Wararka24: 28-02-2026 Warbaahinta Iran ayaa sheegtay in qaraxyo laga maqlay qaybo ka mid ah caasimadda Tehran, kaddib weerarro loo adeegsaday gantaallo oo la sheegay in ay ku lug lahaayeen Mareykanka iyo Israa’iil.
Wakaaladda wararka ee Fars ayaa tebisay in dhowr gantaal ay ku dhaceen aagga University Street iyo Jomhouri, iyadoo qiiq laga arkayay qeybo ka mid ah magaalada.
Sarkaal sare oo Mareykan ah ayaa u sheegay Al Jazeera in howlgalka uu ahaa mid wadajir ah oo lagu beegsanayay bartilmaameedyo milateri, si cadaadis loogu saaro Iran arrinta barnaamijkeeda nukliyeerka. Wuxuu sheegay in hawlgalku ku lug lahaa diyaarado dagaal iyo maraakiib ku sugan gobolka.
Associated Press ayaa iyaduna warisay in weerarka uu ka dhacay meel u dhow xarumo muhiim ah oo ku yaalla Tehran, oo ay ku jiraan agagaarka xafiisyada Hoggaamiyaha Sare ee Iran, Ayatollah Ali Khamenei.
Reuters ayaa soo xigatay sarkaal sheegay in Khamenei aanuu ku sugneyn goobta la beegsaday, isla markaana loo wareejiyay meel ammaan ah.
Madaxweynaha Mareykanka Donald Trump ayaa qoraal uu soo saaray ku xaqiijiyay in Mareykanku ka qayb qaatay howlgalka, isagoo sheegay in la beegsaday bartilmaameedyo muhiim ah. Ilaa hadda, ma jiro war rasmi ah oo ka soo baxay dowladda Iran oo faahfaahin ka bixiya khasaare ama jawaab celin milateri.
Weerarkan ayaa sare u qaaday xiisadda gobolka Bariga Dhexe, iyadoo laga cabsi qabo in xaaladdu isu beddesho iska horimaad ballaaran oo saameeya dalal badan.
