Wararka24: 26-02-2026 Madaxweynaha Puntland, Saciid Cabdullaahi Deni, oo ku sugan Muqdisho ayaa waday kulamo uu la yeeshay xubno ka tirsan beesha caalamka si looga wada hadlo xaaladda siyaasadeed ee dalka. Deni ayaa kulan gaar ah la qaatay Ergayga gaarka ah ee Qaramada Midoobay u qaabilsan Soomaaliya, James Swan, kaas oo ku booqday hoteelka uu ka degan yahay agagaarka xerada Xalane.
Labada mas’uul ayaa diiradda saaray marxaladda siyaasadeed ee haatan taagan, gaar ahaan is-mariwaaga ka jira hannaanka doorashooyinka iyo wax ka beddelka Dastuurka kumeel gaarka ah. Sida lagu sheegay war kooban oo ka soo baxay xafiiska madaxweynaha Puntland, kulanku wuxuu ahaa mid lagu doonayay in lagu dardargeliyo wada-hadal iyo is-afgarad siyaasadeed.
Kulankan ayaa ku soo beegmay ka dib markii Saciid Deni uu horay kulan ula yeeshay madaxweynihii hore ee Soomaaliya, Maxamed Cabdullaahi Farmaajo, iyadoo kulankaasi lagu falanqeeyay xaaladda guud ee dalka. Labada dhinac ayaa ka wada hadlay adkeynta midnimada, xal u helidda khilaafaadka dastuurka iyo doorashooyinka, iyo ka hortagga qalalaase amni oo ka dhaca caasimadda.
Mas’uuliyiintu waxay bogaadiyeen dadaallada socda ee lagu raadinayo heshiis loo dhan yahay si looga fogaado hubanti la’aan siyaasadeed. Sida ay sheegeen ilo-wareedyo siyaasadeed, natiijada kulamada noocan ah ayaa saameyn ku yeelan karta jihada siyaasadeed ee dalka iyo mustaqbalka geeddi-socodka dowlad-dhiska.
Kulamadan ayaa imaanaya xilli ay Soomaaliya wajahayo isgoys siyaasadeed, iyadoo khilaafaadka doorashooyinka iyo dastuurka ay weli taagan yihiin. Dhanka kale, xaalado bani’aadannimo oo ka dhashay abaaro ka jira qaybo ka mid ah dalka ayaa sii adkeeyay duruufaha, taas oo saameyn ku yeelatay nolosha dadka iyo xoolaha.
