Wararka25: 24-02-2026 Dowladda Federaalka Soomaaliya ayaa shaacisay inay diyaar u tahay dib-u-hawlgelinta heshiis amni oo soo jirey oo la saxiixay sanadkii 1980-kii, kaas oo u oggolaanaya Mareykanka isticmaalka dekedaha iyo garoomada diyaaradaha ee dalka, si loo xoojiyo iskaashiga dhinaca amniga iyo la-dagaallanka khataraha ka jira gobolka.
Wasiiru Dowlaha Arrimaha Dibadda Soomaaliya, Cali Maxamed Cumar (Cali Balcad), ayaa warbaahinta u sheegay in labada dal ay horey u lahaayeen qaab-dhismeed iskaashi oo sharci ah, isla markaana heshiiskaasi weli saldhig u yahay wada-shaqeynta amni ee Muqdisho iyo Washington.
Wuxuu caddeeyay in xukuumadda federaalka ay Mareykanka u bandhigtay in heshiiskaas dib loo cusbooneysiiyo, si wada-shaqeyntu u noqoto mid waafaqsan duruufaha amni ee hadda taagan iyo baahida Soomaaliya u qabto taageero farsamo, tababar iyo qalab casri ah.
Tallaabadan ayaa ku soo beegmeysa xilli ay sii kordhayaan dadaallada diblomaasiyadeed ee lagu doonayo in la xoojiyo xiriirka Soomaaliya la leedahay saaxiibadeeda caalamiga ah, gaar ahaan dhinaca amniga badda iyo hawlgallada la-dagaallanka kooxaha hubeysan.
Dowladda Federaalka ayaa sheegtay in dib-u-hawlgelinta heshiiskan ay ka dhigan tahay in Mareykanka lagala shaqeeyo sugidda amniga marin-biyoodka Badda Cas iyo Gacanka Cadmeed, kuwaas oo muhiim u ah ganacsiga caalamiga ah iyo isku-socodka maraakiibta.
Mas’uuliyiinta dowladda ayaa sidoo kale tilmaamay in tallaabadani ay muujinayso in Muqdisho ay doonayso in iskaashiga amni uu noqdo mid sharci ah oo hoos yimaada Dowladda Federaalka, iyadoo la ilaalinayo madax-bannaanida iyo midnimada dhuleed ee dalka.
Arrintan ayaa imanaysa xilli ay jiraan dhaqdhaqaaqyo kale oo diblomaasiyadeed oo ku saabsan loollan istiraatiiji ah oo ka taagan Geeska Afrika, gaar ahaan helitaanka saldhigyo ciidan iyo saameynta quwadaha waaweyn ee gobolka.
Dowladda Federaalka Soomaaliya ayaa sheegtay in ujeedada ugu weyn ee dib-u-hawlgelinta heshiiskan ay tahay in la helo taageero joogto ah oo gacan ka geysata sugidda amniga qaranka, la-dagaallanka argagixisada, iyo xoojinta awoodda hay’adaha amniga dalka, iyada oo la tixgelinayo danaha qaranka iyo xeerarka caalamiga ah.
