Wararka25: 23-02-2026 Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ergo u diray hoggaanka Golaha Mustaqbalka kaddib markii wadahadalladii ka dhacay Madaxtooyada ay kusoo dhammaadeen natiijo la’aan.
Wasiirka Waxbarashada, Faarax Sheekh Cabdulqaadir, iyo taliyihii hore ee NISA, Cabdullaahi Maxamed Cali (Sanbaloolshe), ayaa gaaray Hotel Airport, halkaas oo ay kulan kula yeesheen madaxweynayaasha Jubbaland iyo Puntland, Axmed Maxamed Islaam iyo Siciid Cabdullaahi Deni.
Ilo xog-ogaal ah ayaa sheegay in ergadu ay ujeedkeedu yahay in dib loo kiciyo wada-hadallada, isla markaana laga baajiyo in Golaha Mustaqbalka soo saaro war-murtiyeed ay ku sheegayaan in wadahadalladu ku fashilmeen dhinaca Villa Soomaaliya.
Wararka ayaa intaas ku daraya in madaxweyne Xasan Sheekh uu xalay la xiriiray qaar ka mid ah hoggaamiyeyaasha mucaaradka, isaga oo ka codsaday in fursad la siiyo sii wadista wada-hadallada si xal loogu helo is-mari-waaga taagan.
Khilaafka ugu weyn ayaa weli salka ku haya hannaanka doorashooyinka. Dowladda Federaalka ayaa ku adkeysaneysa in laga guuro nidaamka doorashada dadban ee ku dhisan hab-qaybsiga beelaha lana aado nidaamka qof iyo cod, halka mucaaradku ay diiddan yihiin, iyaga oo ku doodaya in isbeddel degdeg ah oo noocaas ah uu halis gelin karo nidaamka federaalka iyo isku-dheellitirka awood-qaybsiga.
Wadahadallada ayaa kusoo aadaya xilli xasaasi ah oo dalka wajahayo caqabado siyaasadeed oo waaweyn, iyadoo aan weli la isku afgaran qaabka loo wajahayo doorashooyinka iyo wax-ka-beddelka Dastuurka KMG ah.
