Wararka24: 18-02-2026 Dowladda Federaalka Soomaaliya ayaa xaqiijisay in Dowladda Imaaraadka Carabta ay si rasmi ah u joojisay taageeradii dhanka amniga ee ay siin jirtay Soomaaliya, kaddib markii Muqdisho ay ka baxday heshiisyadii iskaashi ee u dhexeeyay labada dhinac.
Wasiirka Arrimaha Dibadda Soomaaliya, Cabdisalaan Cabdi Cali, ayaa sheegay in kaalmada Imaaraadku inta badan ku koobnayd tababar iyo taageero la siin jiray hay’adaha amniga iyo ciidamada qalabka sida.
Wuxuu sheegay in burinta heshiisyadii hore ay meesha ka saartay saldhiggii sharci ee ay ku socon lahayd taageeradaas, isla markaana aysan jirin wax waajib ah oo ku qasbaya Imaaraadka inuu sii wado kaalmada amniga.
Si kastaba ha ahaatee, Dowladda Federaalka ayaa caddeysay in xiriirka diblomaasiyadeed ee Soomaaliya iyo Imaaraadka uusan go’in, iyadoo safaaradaha labada dhinac ay sii wadaan shaqadooda caadiga ah.
Mas’uuliyiintu waxay beeniyeen in go’aanka Muqdisho uu la xiriiro eedeymo caalami ah oo ku saabsan doorka Imaaraadka ee colaadaha dalal kale, iyagoo ku adkeystay in arrintani ay ku saleysan tahay kaliya khilaafyo siyaasadeed iyo kuwo heshiisyo labadaba ah.
