Wararka24: 17-02-2026 Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali (Dhaay), ayaa xaqiijiyay in Dowladda Isutagga Imaaraadka Carabta ay hakisay taageeradii dhinaca amniga ee ay siin jirtay Soomaaliya, kadib markii Dowladda Federaalka Soomaaliya ay si rasmi ah uga baxday heshiisyadii iskaashi ee u dhexeeyay labada dal.
Wasiirka ayaa sheegay in taageerada Imaaraadku ay inta badan ku koobnayd dhinaca ciidamada iyo hay’adaha amniga, isla markaana joojintaasi ay timid kaddib burburkii heshiisyadii hore.
Waxa uu xusay in marka heshiisyada la baabi’iyo aysan jirin sabab sharci ah oo taageeradaasi u sii socon karto.
Inkasta oo taageerada amni la hakiyay, Wasiir Cabdisalaan Dhaay ayaa caddeeyay in xiriirka diblomaasiyadeed ee Soomaaliya iyo Imaaraadka uusan go’in. Waxa uu tilmaamay in safaaradaha labada dal ee Muqdisho iyo Dubai ay weli shaqeynayaan, taasoo muujinaysa in xiriirka rasmiga ah ee labada dowladood uu sii jiro.
Wasiirku wuxuu sidoo kale sheegay in go’aanka Soomaaliya ee ka bixitaanka heshiisyada uusan si gaar ah ula xiriirin eedeymaha loo jeediyay Imaaraadka ee ku saabsan faragelinta arrimaha dalal kale sida Suudaan iyo Yemen, halkaas oo lagu eedeeyay inuu taageero siiyo dhinacyo hubeysan.
Bishii Janaayo, Dowladda Federaalka Soomaaliya ayaa ku dhawaaqday in ay baabi’isay dhammaan heshiisyadii iskaashi ee ay la lahayd Imaaraadka Carabta, oo ay ku jireen kuwo la xiriira amniga, iyadoo ku eedeysay Abu Dhabi in faragelintaas ay wax u dhimayso madax-bannaanida iyo midnimada Jamhuuriyadda Federaalka Soomaaliya.
