Wararka24: 16-02-2026; Ciidanka Xoogga Dalka Soomaaliyeed oo kaashanaya ciidamada deegaanka ee Macawiisleyda ayaa xalay fiidkii howlgal qorsheysan ka fuliyay inta u dhexeysa deegaannada Yasooman iyo Moqokori ee gobolka Hiiraan, halkaas oo lagu beegsaday dagaalyahanno ka tirsan kooxda Al-Shabaab.
Wasaaradda Gaashaandhigga ayaa sheegtay in howlgalkan lagu qaaday kadib markii la helay xog muujinaysa dhaqdhaqaaq ay wadeen xubno ka tirsan Al-Shabaab oo qorsheynayay weerar ka dhan ah gaadiid ay saarnaayeen dad shacab ah oo marayay waddooyinka gobolka Hiiraan.
Intii uu howlgalka socday, ciidamada ayaa dabagal ku sameeyay kooxdaasi, waxaana la dilay afar dagaalyahan oo ka tirsan Al-Shabaab, sidoo kalena la gubay gaari ay adeegsanayeen, sida lagu sheegay wararka rasmiga ah.
Howlgalkan ayaa qeyb ka ah howlgallada joogtada ah ee ka socda gobollada bartamaha iyo koonfurta dalka, kuwaas oo lagu beegsanayo kooxda Al-Shabaab.
Maalmihii la soo dhaafay, Al-Shabaab ayaa la kulmeysay culaysyo xooggan oo ka yimid dagaallo iyo duqeymo ka dhacay gobollada Shabeellooyinka, Jubbooyinka iyo Hiiraan, halkaas oo lagu dilay xubno iyo hoggaamiyeyaal ka tirsan kooxda.
