Faah-faahinno dheeraad ah ayaa laga helayaa howlgal qorsheysan oo ay maanta ciidamada Nabad-sugidda Jubbaland ka sameeyeen qaybo kamid ah gobolka Jubbada Hoose, kaas oo lagu burburiyay warshad qaraxyo, isla markaana lagu dilay xubno ka tirsan Al-Shabaab.
Howlgalka oo si gaar ah uga dhacay dhulka Baddamadow ee u dhaxeeya magaalooyinka Raaskaambooni iyo Badhaadhe, ayaa lagu beegsaday xarun qaraxyo lagu farsameyn jiray oo ay lahaayeen dagaalyahannada Al-Shabaab.
Warsaxaafadeed kasoo baxay Jubbaland ayaa lagu sheegay in ciidamada Nabad-sugidda iyo kuwa Daraawiishta ay gacanta ku dhigeen warshadda miinooyinka, ayna fashiliyeen qaraxyo ay kooxdaasi diyaarinaysay. Qoraalka ayaa xusay in goobta laga helay tiro badan oo miinooyin ah.
Intii howlgalka socday, ciidamada ayaa hal meel oo kaliya kasoo qabtay ilaa 90 xabo oo miinooyin ah, kuwaas oo la sheegay in loo diyaarinayay in lagu waxyeelleeyo shacabka iyo ciidamada. Sawirro muujinaya miinooyinka la qabtay ayaa la soo bandhigay.
Dhanka kale, wararku waxay sheegayaan in maydadka ku dhowaad 50 xubnood oo ka tirsanaa Al-Shabaab loo qaaday magaalada Raaskaambooni, kadib dagaal culus oo ka dhacay aaggaas. Saraakiisha Jubbaland ayaa sheegay in howlgalladu ay sii socon doonaan, si loo ciribtro saldhigyada argagixisada ee ku sugan gobollada Jubbooyinka.
