Wararka24: 12-02-2026 Wasiirka Gaashaandhigga Soomaaliya, Axmed Macallin Fiqi, ayaa qoraal adag kaga jawaabay hadal ka soo yeeray Madaxweynaha Puntland, Siciid Cabdullaahi Deni, oo xalay khudbad ka jeediyay xerada Xalane, taas oo dhalisay hadal-heyn ballaaran.
Madaxweyne Deni ayaa si kulul u dhaliilay qaar kamid ah xildhibaannada Hawiye iyo xaaladda ka jirta Muqdisho, isaga oo ku andacooday in caasimaddu ay noqotay meel “dalka laga kala goynayo,” sida uu hadalka u dhigay. Wuxuu sidoo kale xusay in dalka u baahan yahay badbaadin iyo in si degdeg ah heshiis looga gaaro hannaanka doorashooyinka, xilli muddo kooban ay ka harsan tahay dhammaadka xil-heynta Madaxweyne Xasan Sheekh.
Wasiir Fiqi oo ka falceliyay hadalkaas ayaa sheegay in Madaxweyne Deni uu ku fashilmay shaqadiisii hoggaamineed, isla markaana hadalladiisu ay yihiin “calaacal” iyo eedeyn aan xal wadin. Wasiirka ayaa ku eedeeyay Deni inuu marar badan la safanayo shisheeyaha marka ay arrimo khilaaf ka dhex taagan yihiin Soomaaliya iyo dalal kale, isla markaana uu ka shaqeeyo kala dhantaalidda midnimada dalka.
Fiqi ayaa sidoo kale ku tilmaamay hadallada Deni kuwo ka tarjumaya siyaasi doonaya inuu dalka xukumo isagoo isla mar ahaantaana carqaladeynaya xiriirka Dowladda Federaalka iyo maamul goboleedyada, kana doorbidaya kulamada hoteellada halkii uu ka geli lahaa Villa Soomaaliya.
Isdhaafsigan hadallo kul-kulul ah ayaa imanaya xilli dalka uu wajahayo khilaaf siyaasadeed oo xooggan oo la xiriira arrimaha doorashooyinka, dastuurka iyo jihada siyaasadeed ee dalka, taas oo sii adkeynaysa isfaham la’aanta u dhexeysa hoggaanka Federaalka iyo qaar kamid ah maamul goboleedyada.
