Wararka24: 28-02-2026 Madaxweynaha Jamhuuriyadda Jabuuti, Ismaaciil Cumar Geelle, ayaa dhaliil u jeediyay duqeymaha cirka ee Mareykanku ka fuliyo gudaha Soomaaliya, isagoo sheegay in hawlgallada noocaas ah aan mararka qaar lagala tashan dalalka gobolka.
Wareysi uu siiyay joornaalka Jeune Afrique ayuu ku sheegay in tallaabooyinka milateri ee aan lala wadaagin dowladaha deriska ahi ay wiiqi karaan dadaallada lagula dagaallamayo kooxaha xagjirka ah.
Geelle ayaa ku dooday in ku tiirsanaanta xog sirdoon oo aan laga hubin ilaha gobolka ay keeni karto qaladaad, isla markaana ay sababi karto khasaare rayid.
Wuxuu sheegay in la-tashiga dowladaha ay khuseyso, oo ay ku jirto Dowladda Federaalka Soomaaliya, uu muhiim u yahay hufnaanta hawlgallada iyo yareynta waxyeellada ka dhalan karta.
Dhanka kale, Taliska Milateriga Mareykanka ee Afrika (AFRICOM) ayaa hore u sheegay in duqeymaha lagu fuliyo Soomaaliya ay yihiin kuwo iskaashi la leh Dowladda Federaalka, isla markaana lagu beegsado Al-Shabaab iyo Daacish.
Dowladda Soomaaliya ayaa iyaduna marar badan ku tilmaantay hawlgallada kuwa wadajir ah oo lagu wiiqayo awoodda kooxaha hubeysan.
Hadallada Geelle ayaa imanaya xilli Jabuuti ay martigeliso saldhigga Camp Lemonnier, oo ah xarunta ugu weyn ee ciidamada Mareykanka ku leeyihiin Afrika, isla markaana ay qayb ka tahay howlgalka Midowga Afrika ee AUSSOM ee ka socda Soomaaliya.
Ilaa hadda, ma jiro war rasmi ah oo ka soo baxay AFRICOM ama Dowladda Federaalka oo si toos ah uga jawaabaya wareysiga madaxweynaha Jabuuti.
