Wararka24: 27-01-2026 Xiisadda u dhaxeysa Mareykanka iyo Iran ayaa mar kale cirka isku shareertay, kaddib markii Washington ay ciidamo dheeraad ah oo dhoobtay gobolka, halka Tehran ay ka digtay cawaaqib culus haddii cadaadis milatari lagu sii wado.
Wararka la helayo ayaa sheegaya in markabka diyaaradaha xambaara ee USS Abraham Lincoln, oo ay wehliyaan maraakiib dagaal oo hubeysan, uu ku sugan yahay biyaha Gacanka Carabta, iyadoo ciidamada Mareykanka lagu soo warramayo inay ku jiraan heegan sare. Dowladda Mareykanka ayaa tallaabadan ku sheegtay mid lagu xoojinayo amniga gobolka, balse Iran ayaa ku tilmaantay hanjabaad toos ah.
Dhanka Iran, mas’uuliyiin ka tirsan Wasaaradda Gaashaandhigga ayaa sheegay in dalkoodu uusan aqbali doonin wax cadaadis ah, iyagoo ku gooddiyay in jawaab adag laga bixin doono haddii la soo weeraro. Warbaahinta dowladda ayaa sidoo kale baahisay fariimo muujinaya diyaar-garow milatari iyo digniino loo diray xulafada Mareykanka ee gobolka.
Isu-tagga Imaaraadka Carabta, oo martigeliya saldhigyo Mareykan ah, ayaa dhankiisa ku dhawaaqay in uusan oggolaan doonin in dhulkiisa loo adeegsado weerar ka dhan ah Iran. Go’aankan ayaa yimid kaddib digniino ay Tehran u dirtay dalalka deriska ah, oo ku saabsan in saldhigyada shisheeye ay noqon karaan bartilmaameed haddii xiisaddu isu beddesho d-agaal furan.
Khubaro dhanka amniga ah ayaa sheegaya in dhaq-dhaqaaqyada milatari ee hadda socda ay kordhinayaan halista jawabo degdeg ah, iyagoo ka digaya in qalad yar uu horseedi karo d-agaal ballaaran oo saameeya gobolka oo dhan.
