Wararka24: 26-01-2026 Madaxweynihii hore ee Mareykanka Barack Obama iyo Marwadiisi hore Michelle Obama ayaa si kulul uga hadlay howlgallada ay wadaan ciidamada socdaalka Mareykanka (ICE) ee ka socda gobolka Minnesota, iyagoo dilka Alex Pretti ku tilmaamay “musiibo qalbi-jab leh.”
War-saxaafadeed ay wadajir u soo saareen, lamaanaha Obama ayaa sheegay in toogashadu ay tahay digniin culus oo ku wajahan dhammaan Mareykanka, iyagoo xusay in qiyamkii asaasiga ahaa ee dalka ay wajahayaan weerarro isa soo taraya.
“Toddobaadyo badan, shacabka dalka oo dhan waxay si sax ah uga caroodeen muuqaalka shaqaale ICE ah oo wajiyadooda qariyay iyo wakiillo kale oo federaal ah oo si arxan-darro ah u dhaqmaya, una adeegsanaya xeelado cabsi gelin, dhibaateyn iyo kicin, kuwaas oo khatar gelinaya dadka ku nool magaalo weyn oo Mareykan ah,” ayaa lagu yiri bayaanka.
Waxay sidoo kale ku eedeeyeen maamulka Madaxweyne Donald Trump inuu sii hurinayo xaaladda, iyagoo sheegay in toogashooyinka dhacay aan lagu samayn baaritaan dhab ah, arrintaas oo ay ku tilmaameen mid si toos ah uga hor imaanaysa caddeymaha muuqaalka. “Tani waa inay joogsataa,” ayay yiraahdeen.
Dhanka kale, Madaxweynihii hore ee Mareykanka Bill Clinton ayaa isna si adag u cambaareeyay maamulka Trump, isagoo ku eedeeyay in shacabka Mareykanka laga qariyay xaqiiqda ku saabsan toogashooyinkii ka dhacay Minneapolis oo ay geysteen saraakiisha ICE.
Bayaan uu Axaddii soo saaray, Clinton ayaa ku tilmaamay dhacdooyinka Minnesota “muuqaallo naxdin leh” oo aanu waligiis filayn in ay ka dhacaan Mareykanka. Wuxuu sheegay in dad laga soo qabanayo guryahooda, goobahooda shaqada iyo waddooyinka, iyadoo askartu wajiyada qarinayaan, isla markaana bannaanbaxayaal nabadeed si aan sharci ahayn loola dhaqmay.
Bill Clinton ayaa carrabka ku adkeeyay in dhammaan ficilladaasi yihiin kuwo aan la aqbali karin, isla markaana la iska ilaalin kari lahaa ka hor inta aysan xaaladdu heerkan gaadhin. Wuxuu sheegay in shacabka Mareykanka been loo sheegay marka ay timaaddo toogashooyinka iyo tallaabooyinka ay ICE ka waddo gobolka Minnesota.
