Wararka24: 26-01-2026 Magaalada Nairobi ee caasimadda dalka Kenya ayaa maanta lagu daah-furay shir ku saabsan maalgelinta caafimaadka Soomaaliya, kaas oo ay ka qeyb-galayaan mas’uuliyiin ka socota dowladda federaalka, dowlad-goboleedyada, iyo saaxiibada caalamiga ah ee taageera horumarinta adeegyada caafimaadka dalka.
Shirka ayaa si rasmi ah u furay Wasiirka Wasaaradda Caafimaadka iyo Daryeelka Bulshada Soomaaliya, Cali Xaaji Aadan, waxaana diiradda lagu saarayaa sidii loo xoojin lahaa maalgelinta, loona horumarin lahaa nidaamka caafimaadka ee Soomaaliya si uu u noqdo mid waara oo hufan.
Kulanka ayaa waxaa sidoo kale goobjoog ka ahaa Agaasimaha Guud ee Wasaaradda Caafimaadka, Dr. Guuleed Cabdijaaliil, wasiirrada caafimaadka ee dowlad-goboleedyada, wakiillo ka socday Gobolka Banaadir, iyo hay’ado caalami ah oo door ku leh taageerada caafimaadka Soomaaliya.
War-saxaafadeed kasoo baxay Wasaaradda Caafimaadka ayaa lagu sheegay in shirka inta uu socdo lagu gorfeeyn doono mideynta dadaallada caafimaad, xoojinta wada-shaqeynta hay’adaha kala duwan, iyo hirgelinta hannaan maalgelin oo waara oo lagu horumarinayo adeegyada caafimaadka.
Ujeeddada ugu weyn ee shirka ayaa ah in la xaqiijiyo in shacabka Soomaaliyeed ay helaan adeegyo caafimaad oo tayo leh, si siman loo wada gaarsiin karo, isla markaana daboolaya baahiyaha caafimaad ee guud ahaan dalka.
Wasaaradda Caafimaadka Federaalka ayaa mar kale adkeysay sida ay uga go’an tahay hoggaaminta dadaallada qaran ee lagu dhisayo nidaam caafimaad oo casri ah, loo wada dhan yahay, iyadoo si dhow ula shaqeynaysa daneeyayaasha gudaha iyo kuwa caalamiga ah si loo xaqiijiyo caafimaadka iyo badbaadada bulshada Soomaaliyeed.
Muddooyinkii u dambeeyay, Dowladda Federaalka Soomaaliya ayaa wadday dadaallo joogto ah oo lagu ballaarinayo helitaanka adeegyada caafimaadka, si muwaadin kasta uu u helo daryeel caafimaad oo tayo leh, loona gaarsiin karo dhammaan gobollada dalka.
