Wararka24: 22-01-2026: Madaxweynaha Somaliland, Cabdiraxmaan Maxamed Cabdillaahi Cirro, oo ku sugan magaalada Davos ee dalka Switzerland halkaas oo uu ka socdo Shirka Dhaqaalaha Adduunka, ayaa kulan la yeeshay Madaxweynaha Israa’iil, Isaac Herzog.
Madaxweyne Isaac Herzog ayaa qoraal uu ku daabacay baraha bulshada ku sheegay inuu soo dhaweynayo xiriirka cusub ee u dhexeeya Somaliland iyo Israa’iil, isaga oo muujiyay rajada ah in iskaashiga labada dhinac uu faa’iido u noqdo labada dal.
“Waxaan ku faraxsanahay inaan Davos kula kulmo Madaxweynaha Somaliland, Cabdiraxmaan Maxamed Cabdillaahi. Waxaan soo dhaweynayaa aasaasidda xiriirka diblomaasiyadeed ee u dhexeeya labada dhinac, waxaana rajeynayaa in aan sii xoojinno iskaashiga si ay uga faa’iideystaan labada dal,” ayuu yiri Madaxweyne Herzog.
Madaxweynaha Somaliland ayaa Davos u tagay safar aan hore loo shaacin, kadib markii uu maalin ka hor baraha bulshada ku baahiyay sawir uu saaran yahay mid ka mid ah diyaaradaha madaxda u qaada goobta shirka, isaga oo xilligaas aan faahfaahin ka bixin halka uu ku wajahnaa.
Wararka la helayo ayaa sheegaya in Madaxweyne Cirro uu Davos u joogay kulammo uu la yeeshay wufuud caalami ah oo ka qeybgalaysa shirka, isaga oo ilaa hadda si rasmi ah ula kulmay Madaxweynaha Israa’iil, oo ah dalka keliya ee si cad u aqoonsaday Somaliland.
Ilo xog-ogaal ah ayaa sidoo kale tilmaamaya in kadib dhammaadka safarka Davos la filayo in Madaxweynaha Somaliland uu booqasho ku tago Israa’iil, halkaas oo la filayo in laga wada hadlo xoojinta iskaashiga labada dhinac, inkastoo aan si rasmi ah loo shaacin faahfaahinta arrintaas. video daawo
