Muqdisho –Wararka24:- Hay’adda Diiwaangelinta iyo Aqoonsiga Qaranka ee Soomaaliya (NIRA) ayaa ku dhawaaqday in laga bilaabo 31-ka Oktoobar 2025, qaadashada Kaarka Aqoonsiga Qaranka ay noqon doonto adeeg lacag lagu bixin doono, sida lagu sheegay qoraal rasmi ah oo ay hay’addu soo saartay.
NIRA ayaa sheegtay in muddo xaddidan loo qabtay dhammaan muwaadiniinta aan weli qaadan kaarkooda inay si bilaash ah u dalbadaan inta ka horreysa 31-ka Oktoobar, ka hor inta aan adeeggaasi laga dhigin mid lacag leh.
“Muwaadiniinta aan weli qaadan Kaarka Aqoonsiga Qaranka waxaa lagu wargelinayaa in ay fursad u haystaan inay si bilaash ah u dalbadaan kaarka illaa dhammaadka bisha Oktoobar,” ayaa lagu yiri qoraalka hay’adda oo maanta lagu faafiyay warbaahinta dowladda.
Hay’addu ma aysan shaacin ilaa hadda lacagta rasmiga ah ee laga qaadi doono marka nidaamkan cusub la dhaqan geliyo, balse waxay sheegtay in tallaabadan ay qayb ka tahay qorshaha kor loogu qaadayo adeegyada diiwaangelinta iyo ilaalinta xogta muwaadiniinta.
NIRA ayaa tilmaamtay in bixinta lacagta ay ka caawin doonto hay’addu inay si hufan u maamusho adeegyada, isla markaana kor loogu qaado tayada kaararka iyo nidaamka keydinta xogta dalka.
Kaarka Aqoonsiga Qaranka ayaa la bilaabay sannadihii u dambeeyay si loo mideeyo xogta muwaadiniinta Soomaaliyeed, iyadoo la sheegay in kaarkaasi uu muhiim u yahay helitaanka adeegyada dowliga ah sida baasaboorka, canshuuraha, iyo nidaamka codbixinta doorashooyinka mustaqbalka.
Go’aankan cusub ee NIRA ayaa kusoo beegmaya iyadoo weli muwaadiniin badan aysan weli helin kaarkooda sababo la xiriira dib u dhacyo farsamo iyo xaddidaad xagga xarumaha diiwaangelinta ah, gaar ahaan gobollada ka fog caasimadda Muqdisho.
Hay’addu waxay ugu baaqday bulshada Soomaaliyeed inay si degdeg ah uga faa’iidaystaan mudada ka hadhay ee adeegga lacag la’aanta ah, si ay u helaan kaarkooda aqoonsiga qaranka ka hor waqtiga kama dambaysta ah ee la cayimay.
