Madaxweynaha Puntland Siciid Cabdullaahi Deni ayaa u baxay safar diblomaasiyadeed oo uu ku tagayo dalalka Itoobiya iyo Imaaraadka Carabta, iyadoo safarkaan uu qeyb ka yahay dadaallada Puntland ay ku xoojinayso xiriirka caalamiga ah iyo iskaashi dhinacyo badan leh.
Madaxweynaha ayaa safarkiisa ka bilaabay magaalada Boosaaso oo uu dhawaan ku sugnaa si uu ugu kuurgalo howlgallada ka dhanka ah kooxaha argagixisada ee ku sugan buuraha gobolka Bari.
Wararka la helayo ayaa tilmaamaya in Madaxweyne Deni uu kulamo la qaadan doono madaxda sare ee Itoobiya si looga wada hadlo amniga xuduudaha, iskaashiga la dagaalanka argagixisada, iyo horumarka dhaqaalaha gobolka.
Ka dib booqashada Itoobiya, Madaxweyne Deni ayaa u sii gudbi doona dalka Imaaraadka Carabta, gaar ahaan magaalada Dubai, halkaas oo uu la kulmi doono madaxda dowladda Imaaraadka si looga wada xaajoodo maalgashi, taageero horumarineed, iyo xiriirka Puntland la leedahay dalalka Khaliijka.
Intaa kadib, waxaa la filayaa in Deni uu tago magaalada Nairobi ee dalka Kenya, halkaas oo uu kulamo kula qaadan doono wakiillo ka socda beesha caalamka iyo madax ka tirsan maamulada Soomaaliyeed, gaar ahaan Madaxweynaha Jubbaland, Axmed Maxamed Islaam.
Safarka Deni ayaa loo arkaa mid muhiim u ah Puntland xilli ay jiraan khilaafaad siyaasadeed oo ka jira xiriirka u dhexeeya dowlad-goboleedyada iyo dowladda federaalka. Waxaana la rumeysan yahay in safarkani uu xambaarsan yahay dadaallo lagu xoojinayo mowqifka siyaasadeed ee Puntland iyo raadinta taageero dibadeed.
Safarkan ayaa imanaya iyadoo Puntland ay wajahaysay xaalado amni iyo mid siyaasadeed, waxaana rajada laga qabo ay tahay in kulamada uu Madaxweynaha la yeelanayo madaxda Itoobiya iyo Imaaraadka ay horseedi doonaan iskaashi dhaqaale iyo mid amni oo waxtar u leh gobolka.
