Wararka24: 17-02-2026;Xisbiga mucaaradka ah ee Liberal-ka dalka Australia ayaa si cad u beeniyay in dukumiinti sir ah oo bannaanka u soo baxay uu matalayo siyaasaddooda rasmiga ah, kaddib markii warbaahinta dalkaasi baahisay qorshe soo jeedinaya in la adkeeyo ama la hakiyo fiisooyinka dadka ka imanaya dalal colaado ka jiraan, oo ay Soomaaliya ka mid tahay.
Qorshaha la dusiyay ayaa soo jeedinayay in la xakameeyo dal-ku-galka dadka ka imanaya deegaannada ay maamulaan kooxaha hubeysan, iyadoo lagu sababeeyay “sugidda amniga qaranka.” Arrintaasi waxay walaac xooggan ku abuurtay Soomaalida ku nool Australia, gaar ahaan kuwa ku tiirsan barnaamijyada isu-keenidda qoysaska iyo fiisooyinka bani’aadannimada.
Hase yeeshee, Angus Taylor oo ka mid ah hoggaanka sare ee xisbiga Liberal-ka ayaa sheegay in dukumiintigaasi uusan ahayn siyaasad rasmi ah, balse uu yahay qoraal ay diyaariyeen shaqsiyaad hore, islamarkaana aan lagu ansixin golaha sare ee xisbiga. Afhayeenkii hore ee arrimaha socdaalka ayaa isna beeniyay inuu taageeray qorshe si gaar ah u beegsanaya Soomaalida.
Dukumiintiga la dusiyay ayaa sidoo kale soo jeedinayay in la adkeeyo shuruudaha magangalyo-doonka, in la dedejiyo masaafurinta dadka codsiyadooda la diido, iyo in la xoojiyo shuruudaha la xiriira “qiyamka Australia.” Arrimahan ayaa dhaliyay dhaleeceyn uga timid ururrada xuquuqda aadanaha oo ka digay in tallaabo noocan ah ay si gaar ah u saameyn karto qaxootiga iyo ardayda ajaanibta ah.
Khubaro ku takhasusay socdaalka ayaa sheegay in haddii qorshe ku saleysan “deegaan” la hirgeliyo, ay khatar ku tahay in dad rayid ah lagu ciqaabo duruufaha amni ee ka jira meelaha ay ka soo carareen. Xisbiga mucaaradka ah ayaa sheegay in siyaasaddooda rasmiga ah ee socdaalka la soo bandhigi doono waqti dambe.
