Wararka24: 19-02-2026 Senator ka tirsan Aqalka Senate-ka Mareykanka, Lindsey Graham, ayaa beeniyay warar maalmahan ku faafayay baraha bulshada oo la xiriiray xaaladda caafimaad ee Madaxweynaha Isutagga Imaaraadka Carabta, Sheekh Maxamed Bin Zayed Al Nahyan.
Graham ayaa sheegay inuu kulan uu la qaatay madaxweynaha Imaaraadka muddo ku dhow 90 daqiiqo, isla markaana uu ku arkay xaalad caafimaad oo wanaagsan iyo firfircooni, isagoo beeniyay wararka sheegaya in hoggaamiyaha Imaaraadka uu ku sugan yahay xaalad caafimaad oo liidata.
Wararka la isla dhex marayay ayaa soo xoogaystay kaddib markii Madaxweynaha Turkiga, Recep Tayyip Erdogan, uu si lama filaan ah u baajiyay safar uu ku tegi lahaa Abu Dhabi, iyadoo markii hore xafiiskiisa la xiriiriyay baajinta safarka xaalad caafimaad oo lasoo deristay hoggaamiyaha Imaaraadka.
Wakaaladda Wararka Imaaraadka ayaa baahisay muuqaallo muujinaya Senator Graham iyo Sheekh Maxamed Bin Zayed oo ku kulmaya qasriga Al Shati ee Abu Dhabi, si loo muujiyo in madaxweynuhu ku sugan yahay xaalad caadi ah.
Dhinaca kale, falanqeeyayaal ayaa sheegay in wararka la beeniyay ay muujinayaan sida ay baraha bulshada u saameeyaan hadal-heynta siyaasadeed ee gobolka, isla markaana warar aan la xaqiijin ay si degdeg ah u faafaan.
