Wararka24: Hay’adda Sirdoonka iyo Nabadsugidda Qaranka Soomaaliya (NISA) ayaa sheegtay in 12 xubnood oo ka tirsan Al-Shabaab lagu dilay howlgal qorshaysan oo ka dhacay deegaanka Bur-Saruur ee gobolka Shabeellaha Dhexe.
NISA ayaa sheegtay in howlgalka, oo ay hay’addu sheegtay inay ka qeyb qaateen saaxiibada caalamka, lagu bartilmaameedsaday goob ay ku urursanaayeen xubno ka tirsan Al-Shabaab. Bur-Saruur ayaa ku taalla qiyaastii laba kiiloomitir dhanka koonfur-bari deegaanka Cali-Gaduud.
Sida lagu sheegay bayaanka NISA, howlgalka waxaa sidoo kale lagu burburiyay agab ciidan iyo goobo ay kooxda u adeegsan jirtay gabbaad. Hay’addu waxay sheegtay in ciidamada ay weli ku raad-joogaan xubno ka tirsan kooxda oo ka firxaday goobta.
NISA ma aysan faahfaahin nooca hubka ama diyaaradda loo adeegsaday howlgalka, mana aysan bixin xog dheeraad ah oo ku saabsan waqtiga saxda ah ee duqeynta ama khasaaraha dhinaca kale.
Howlgalkan ayaa kusoo beegmaya xilli ciidamada dowladda Soomaaliya iyo saaxiibada caalamka ay kordhiyeen howlgallada xogta sirdoonku hoggaamiso ee ka dhanka ah Al-Shabaab, gaar ahaan gobolka Shabeellaha Dhexe.
20-kii Sebtembar, NISA waxay sheegtay in howlgal ka dhacay deegaannada Guulane iyo Al-Furqaan lagu dilay horjooge iyo saddex dagaalyahan oo Al-Shabaab ah, halka mid kale lagu dhaawacay. Hay’addu waxay sheegtay in horjoogaha la dilay uu kooxda u qaabilsanaa arrimaha qabaa’ilka ee gobolka.
Sidoo kale, NISA waxay 15-kii Sebtembar sheegtay inay Muqdisho iyo nawaaxigeeda ku qabatay 11 qof oo ay ku eedeysay inay xiriir la leeyihiin shabakado Al-Shabaab ah. Howlgalladaasi waxay ka dhaceen Daarusalaam, Garasbaaley, Kaxda, Dayniile iyo Afgooye, sida ay hay’addu sheegtay.
NISA waxay sheegtay in howlgallada noocan ah ay qayb ka yihiin dadaallada lagu wiiqayo awoodda Al-Shabaab iyo shabakadaha ay ku leedahay qaybo ka mid ah dalka. Hay’addu waxay sidoo kale shacabka ugu baaqday inay ciidamada amniga la wadaagaan xogta la xiriirta dhaqdhaqaaqyada Al-Shabaab iyo kooxaha kale ee hubeysan.
